Día Mundial contra o Cambio Climático. Isto afectará ás persoas con enfermidades neurolóxicas

As persoas con enfermidades neurolóxicas son especialmente vulnerables aos efectos do cambio climático.

O Día Mundial contra o Cambio Climático, 24 de outubro, serve para reflexionar sobre os efectos do cambio climático na saúde. Cada vez hai máis estudos que revelan que as persoas con enfermidades neurolóxicas son especialmente vulnerables a estes cambios. As persoas que conviven, por exemplo, con Esclerose Múltiple (EM), migrañas, demencia ou enfermidade de Párkinson poden experimentar un empeoramento dos síntomas debido ás temperaturas extremas e á contaminación atmosférica.

O cambio climático nas enfermidades neurolóxicas

Unha recente revisión publicada en Neurology analizou 364 estudos sobre a relación entre o cambio climático e as enfermidades neurolóxicas, abarcando investigacións realizadas entre 1990 e 2022. Estes estudos centráronse en tres áreas principais:

1. O impacto da contaminación atmosférica: os estudos mostraron que a exposición a contaminantes do aire está relacionada cunha maior frecuencia e gravidade das enfermidades cerebrovasculares.
2. Os eventos climáticos extremos e as fluctuacións de temperatura: observouse que as altas temperaturas e as variacións bruscas do clima poden agravar os síntomas de persoas con EM, migrañas ou demencia.
3. As enfermidades neuroinfecciosas emerxentes: o quecemento global ampliou as zonas onde se desenvolven enfermidades transmitidas por carrachas e mosquitos, como o virus do Nilo Occidental e a encefalite.

Sensibilidade ao calor e Esclerose Múltiple

Para as persoas con EM, a sensibilidade ao calor é un factor importante á hora de agravar os síntomas e provocar os brotes. Segundo un estudo presentado na 73ª Reunión Anual da Academia Estadounidense de Neuroloxía, o aumento das temperaturas podería levar a un aumento nas visitas a hospitais por parte de persoas con EM. Neste estudo analizáronse datos de máis de 106.000 persoas con EM en Estados Unidos e atopouse que nos períodos de clima anormalmente cálido aumentouse nun 4% a probabilidade de visitas a emerxencias e nun 3% a probabilidade de hospitalizacións.

Cambio climático e saúde neurolóxica a longo prazo

O quecemento global non só supón días máis cálidos. Trae tamén consigo unha serie de efectos a longo prazo na saúde das persoas con enfermidades neurolóxicas. Como menciona Holly Elser, autora dun dos estudos e membro da Academia Estadounidense de Neuroloxía, “as tendencias de quecemento poderían tener serias implicacións para a saúde a longo prazo das persoas que viven con EM”.

Neste contorno, o cambio climático podería agravar os síntomas da EM, como a fatiga, a debilidade muscular e os problemas de mobilidade, facendo que as actividades da vida diaria sexan máis difíciles. 

Actuar no Día Mundial contra o Cambio Climático

O Día Mundial contra o Cambio Climático lembra que o cambio climático afecta a todas as persoas, pero algunhas son máis vulnerables que outras. As persoas con enfermidades neurolóxicas deben enfrontar un dobre desafío: o da súa propia condición e o de adaptarse a un contorno climático cada vez máis extremo.

Para protexer a saúde neurolóxica nun mundo onde o cambio climático está avanzando rapidamente, informar e concienciar sobre isto é fundamental. De aí a importancia de políticas ambientais que busquen reducir a contaminación e mitigar os efectos do quecemento global para protexer tanto ao noso planeta como a quen é máis vulnerables aos seus impactos.

O cambio climático claramente ameaza o medio ambiente, pero tamén a saúde das persoas con enfermidades neurolóxicas como a Esclerose Múltiple. No Día Mundial contra o Cambio Climático, debemos lembrar que combater o cambio climático é tamén coidar a saúde de todos e todas. A redución de emisións e o apoio a investigacións sobre saúde e clima poden marcar a diferencia para quen se enfronta a estes desafíos.

Fontes: InfoSalus e Neurología.com