A Comisión Europea aproba Cenrifki, o primeiro tratamento para retrasar a progresión da EM secundaria progresiva
A Comisión Europea aprobou Cenrifki® (tolebrutinib), de Sanofi. Este é o primeiro tratamento autorizado na Unión Europea para retrasar a progresión da discapacidade en casos de Esclerose Múltiple (EM) Secundaria Progresiva sen brotes nos dous ultimos anos.
As opcións de tratamento farmacolóxico para as persoas con EM antes eran moi limitadas. Grazas á invesetigación, cada vez hai máis avances nos tratamentos. Isto supón unha mellora significativa na calidade de vida das persoas que conviven con esta enfermidade.
Un avance para a EMSP
A Esclerose Múltiple Secundaria Progresiva é un tipo de EM caracterizada por un aumento gradual da discapacidade. Nas persoas que non presentan brotes recentes, as alternativas de tratamentos foron escasas. Isto supón unha necesidade médica que ata agora non estaba cuberta.
A Unión Europea, grazas á aprobación de Cenrifki®, incorpora o primeiro medicamento autorizado para retrasar a progresión da discapacidade neste grupo de persoas. Sempre e cando non presenten brotes nos dous últimos anos.
Investigación e innovación ao servizo da EM
Dende FEGADEM apoiamos a investigación e a innovación para buscar formas de seguir mellorando a calidade de vida das persoas con EM. Aumentar ou manter a autonomía destas persoas debe ser unha prioridade para a medicina.
A comunidade científica e a investigación biomédica esfórzase a diario para desenvolver novas opcións terapéuticas dirixidas a cubrir as necesidades non cubertas.
Tamén é importante lembrar que a autorización dun novo tratamento é o inicio dun proceso que despois pode verse influenciado pola avaliación e financiamento de cada país. Isto antes de incorporalo á práctica clínica.
