Nace ONDA PINGÜINA, a primeira radio online creada por persoas con Esclerose Múltiple
Un novo espazo de apoio, información e visibilidade
As iniciativas impulsadas por persoas con Esclerose Múltiple (EM) seguen demostrando o valor da participación activa e o apoio entre iguais. A asociación Baile de Pingüinos puxo en marcha ONDA PINGÜINA – EM la onda, unha radio online creada integramente por persoas que conviven con esta enfermidade.
O proxecto naceu o 26 de maio, coincidindo coa celebración do Día Mundial da Esclerose Múltiple. Tomaron esta data como referencia para sensibilizar á sociedade sobre a realidade das máis de 55.000 persoas que viven con esta enfermidade en España.
Unha radio feita por e para persoas con EM
ONDA PINGÜINA xorde para ofrecer un espazo de encontro, acompañamento e información. Aquí as persoas con EM poderán compartir experiencias, resolver dúbidas e sentirse parte da comunidade.
A iniciativa aposta por unha comunicación próxima e accesible, baseada no concepto de “ritmo pingüino”. Esta filosofía da asociación reivindica a importancia de respectar os tempos, necesidades e circunstancias de cada persoa.
Segundo explican dende a entidade, o proxecto nace dunha idea sinxela. Nace de demostrar que convivir coa EM non impide seguir vivindo, compartindo e construíndo.
Programas sobre dereitos, testemuñas e apoio emocional
A programación de ONDA PINGÜINA aborda diferentes aspectos relacionados coa vida cotiá das persoas con EM e a súa contorna.
Entre os seus contidos destacan:
- Empatía, Social y Justa: un espazo dedicado a informar sobre recursos sociais, dereitos e cuestións legais vinculadas á enfermidade.
- Mil caras y una voz: un programa de entrevistas que dá protagonismo a persoas relacionadas coa EM e as súas experiencias.
- La voz de los familiares: centrado no papel de quen acompaña e coida ás persoas con EM.
- Nuestras Píldoras: cápsulas breves con consellos prácticos para o día a día.
A asociación prevé ampliar progresivamente a oferta de contidos con novos programas e colaboracións.
A importancia de crear comunidade
Ademais de ofrecer información útil, proxectos como ONDA PINGÜINA contibúen a reducir o illamento social que moitas persoas poden experimentar tras o diagnóstico. Deste modo, favorecen o intercambio de experiencias e o apoio entre iguais.
A creación de espazos de participación impulsados polas propias persoas con EM tamén axuda a mellorar a visibilidade da enfermidade. É útil para combater estereotipos e trasladar unha imaxe máis realista da diversidade de situacións que pode vivir quen convive con ela.
Un proxecto para dar voz ás persoas con EM
Dende FEGADEM queremos recoñecer este tipo de iniciativas que fomentan a participación, o empoderamento e a creación de redes de apoio dentro da comunidade da EM.
ONDA PINGÜINA representa unha nova ferramenta para informar, acompañar e conectar a persoas con EM, familiares, profesionais e cidadanía en xeral, contribuíndo a construir unha sociedade máis consciente e comprometida coa realidade desta enfermidade.
As persoas interesadas poden coñecer máis sobre este proxecto e acceder aos seus contidos a través das canles da asociación Baile de Pingüinos.