Novo fármaco para a Esclerose Múltiple podería revertir o dano neurolóxico
Novo tratamento podería revertir o dano neurolóxico na EM, abrindo unha nova esperanza para millóns de persoas.
Un equipo de científicos da Universidade de California en San Francisco e a empresa Contineum Therapeutics desenvolveron un fármaco innovador que podería cambiar o tratamento da Esclerose Múltiple (EM). Este medicamento, coñecido como PIPE-307, demostrou en estudos a súa capacidade para rexenerar a mielina, a capa protectora das células nerviosas que se dana na EM.
A mielina actúa como illante dos nervios, permitindo que os impulsos eléctricos viaxen eficientemente. A EM destrúe esta capa, deixando aos axóns nerviosos expostos e causando unha ampla variedade de problemas neurolóxicos, como dificultade para moverse, perda de visión, e en casos severos, parálise, entre outros. A nova terapia enfócase en estimular a produción de oligodendrocitos, células especializadas na creación de mielina, o que abre unha porta á posibilidade de revertir o dano causado pola enfermidade.
Como funciona PIPE-307?
O fármaco PIPE-307 actúa bloqueando un receptor específico chamado M1R, localizado nas células precursoras de oligodendrocitos (OPC), as responsables de reparar o dano neurolóxico. Segundo o doutor Jonah Chan, quen lidera o proxecto, este é o primeiro medicamento deseñado especificamente para activar a remielinización dos nervios. Aínda que estudos previos con outros medicamentos, como a clemastina, demostraron certa capacidade de rexeneración, PIPE-307 mostra unha efectividade moito maior.
Investigación e desenvolvemento
O descubrimento deste tratamento é froito dunha década de investigación. En 2014, Chan e o seu equipo descubriron que un fármaco antihistamínico tiña a capacidade de estimular a remielinización, pero non era o suficientemente específico. A partires dese achado, os investigadores dirixiron os seus esforzos cara o desenvolvemento dun medicamento máis preciso que actuara directamente sobre o receptor M1R.
En colaboración con Contineum Therapeutics, os científicos lograron deseñar PIPE-307, un medicamento capaz de bloquear este receptor e activar as OPC para rexenerar a mielina nas áreas danadas do Sistema Nervioso Central (SNC). Actualmente, PIPE-307 está en ensaios clínicos de fase II en persoas con EM, tras superar con éxito os estudos iniciais que demostraron a súa seguridade en humanos.
Un futuro prometedor
Se PIPE-307 supera os ensaios clínicos, podería revolucionar o tratamento da EM, ofrecendo unha nova esperanza a millóns de persoas que viven con ela. O avance detería a progresión da enfermidade e podería revertir os danos xa sufridos, algo que ata agora non era posible.
O doutor Ari Green, coautor do estudo, destaca a importancia deste descubrimento: “Poderiamos ter a oportunidade non só de deter a enfermidade, senón tamén de curala”. Esta nova clase de medicamentos baseados na remielinización representa un avance importante na busca dunha cura para a EM.
Podes ler o artigo completo aquí.
