O ‘NadalBus’ de Vigo transfórmase no ‘EMBus’ con motivo do Día Nacional da Esclerose Múltiple

A Asociación Viguesa de Esclerose Múltiple (AVEMPO) organiza xunto a Vitrasa un percorrido solidario pola iluminación do Nadal para visibilizar a enfermidade e facilitar a experiencia ás persoas afectadas.

Durante o percorrido, os usuarios da asociación reclamarán o recoñecemento do 33% de discapacidade automaticamente co diagnóstico co fin de conseguir unha protección social.

Dende AVEMPO lamentamos que non se estean tendo en conta os síntomas invisibles da enfermidade na valoración de discapacidade, que dificultan o día a día das persoas afectadas.

A Asociación Viguesa de Esclerose Múltiple (AVEMPO) organiza este martes xunto a Vitrasa un percorrido especial do coñecido como ‘Nadalbus’, que percorre as rúas viguesas mostrando a iluminación do Nadal. Con motivo do Día Nacional da Esclerose Múltiple (EM), o autobús transformarase durante unha hora no ‘EMbus’, co fin de visibilizar a enfermidade e apoiar ás persoas afectadas pola mesma na cidade. Durante o percorrido, os usuarios de AVEMPO poñerán de manifesto unha reclamación do colectivo: o recoñecemento do 33% de discapacidade automaticamente co diagnóstico, que blindaría unha protección social a todas as persoas afectadas.

O ‘EMbus’ partirá ás 17:30 h da sede de AVEMPO (C/Camilo Veiga, 44) e durante unha hora percorrerá a cidade para que os usuarios poidan gozar de preto os principais atractivos da iluminación do Nadal vigués. Desde AVEMPO celebramos a iniciativa e agradecemos o apoio de Vitrasa, que permitirá que os nosos usuarios poidan gozar da experiencia sen os inconvenientes das aglomeracións, incompatibles cos casos de mobilidade reducida dalgúns afectados de EM.

Ademais, AVEMPO e a cidade de Vigo únense á iniciativa, proposta pola Federación Galega de Esclerose Múltiple (FEGADEM), de iluminar de cor vermella edificios públicos ou monumentos das diferentes cidades galegas para poñer o foco de atención sobre a Esclerose Múltiple. No caso de Vigo iluminaranse de vermello as fontes da rúa Aragón.

RECOÑECEMENTO DO 33% DE DISCAPACIDADE

Con motivo do Día Nacional da Esclerose Múltiple, desde AVEMPO unímonos á reclamación do resto de entidades de persoas afectadas de Esclerose Múltiple en España, que pasa por esixir o recoñecemento do 33% de discapacidade directamente co diagnóstico, necesario para poder acceder a calquera medida de protección social que facilite un mellor acceso ao emprego, mantemento do posto de traballo, apoio en estudos e formación ou obtención de axudas para realizar adaptacións no fogar.

Nos últimos anos, desde AVEMPO vimos como moitas das solicitudes do recoñecemento do 33% de discapacidade non resultaron favorables ao non terse en conta os síntomas invisibles que comporta a coñecida como ‘enfermidade das mil caras’, que teñen un gran impacto na calidade de vida das persoas afectadas: trastornos motores, problemas cognitivos, de agudeza visual, fatiga, aspectos emocionais e psicolóxicos como ansiedade e depresión…. Por iso, desde a asociación reclamamos que o diagnóstico dunha enfermidade neurodegenerativa como é a Esclerose Múltiple comporte o recoñecemento automático do grao mínimo do 33% de discapacidade, sen ter que pasar por todo o proceso burocrático que resulta longo e tedioso aos nosos usuarios, que non sempre ven recoñecida esa discapacidade.

Esta reivindicación enmárcase no conxunto das tres medidas que desde o ano 2011 tanto o Congreso dos Deputados como numerosos parlamentos autonómicos veñen reclamando ao Goberno, sempre con unanimidade de todos os grupos políticos. Ademais da presión política, iniciouse unha campaña de presión social baseada nunha recollida de firmas a través de Change. org iniciada por EME e Araceli Gabaldón, afectada de Esclerose Múltiple, á que se sumou AEDEM- COCEMFE, animando a asinar a petición (http://chng.it/s2 Z7 bmvgdD) e darlle difusión para lograr o maior número de firmas que avalen esta reivindicación. Para darlle máis visibilidade está a utilizarse o hashtag #33AHORA.

QUE É AVEMPO?

A Asociación Viguesa de Esclerose Múltiple de Pontevedra (AVEMPO), nacida en 1996, é unha entidade sen ánimo de lucro que ten por obxectivos axudar, informar e mellorar a calidade de vida dos afectados de Esclerose Múltiple e a súa contorna. Como socios de AVEMPO, todos os afectados de EM da provincia contan cun espazo onde centrar a procura de solucións e compartir as súas preocupacións con outras persoas coa mesma enfermidade. Na sede da asociación, eixo do noso labor, todos os socios que o precisan e desexan poden obter información e beneficiarse dos servizos que ofrece AVEMPO: fisioterapia, logopedia, psicoloxía, terapia ocupacional, traballo social, ioga, pilates e pintura.

QUE É A ESCLEROSE MÚLTIPLE?

A Esclerose Múltiple (EM) é unha enfermidade crónica, autoinmune e dexenerativa do Sistema Nervioso Central que afecta o cerebro e á medula espinal. É unha das enfermidades neurolóxicas máis comúns entre a poboación de 20 a 30 anos, con máis de 47.000 persoas afectadas en España. Trátase da segunda causa de discapacidade neurolóxica en adultos novos e afecta predominantemente ás mulleres. Á EM coñécella tamén como ‘A enfermidade das mil caras’, xa que presenta múltiples manifestacións e afecta a cada persoa de forma diferente. Na actualidade descoñécese a causa da enfermidade, polo que non existe aínda unha cura, pero si varios tratamentos modificadores do curso da patoloxía.