FEGADEM e as súas entidades presentan o manifesto por unha mellor atención sanitaria na EM

Con motivo do 30 de maio, Día Mundial da Esclerose Múltiple, FEGADEM e as entidades galegas de EM presentamos un manifesto centrado na mellora da atención sanitaria ás persoas con Esclerose Múltiple en Galicia.

Este documento nace da necesidade de visibilizar as experiencias, preocupacións e demandas das persoas con EM e das súas familias, poñendo o foco en cuestións como o diagnóstico, as listas de espera, a coordinación sanitaria, o acceso á rehabilitación, a atención no rural, o apoio emocional ou o transporte adaptado.

Un informe para coñecer a realidade da atención sanitaria na EM en Galicia

O manifesto acompáñase da elaboración do “Informe sobre a atención sanitaria na Esclerose Múltiple en Galicia”, impulsado por FEGADEM e as entidades galegas de EM, co obxectivo de recompilar datos actualizados e coñecer de primeira man as necesidades das persoas con EM na nosa comunidade no referente á atención sanitaria que se lles presta.

Malia que a maioría das persoas afirma que a calidade dos servizos de neuroloxía é boa ou moi boa, os resultados do informe evidencian dificultades que afectan á calidade de vida das persoas:

• O 51,78% das persoas enquisadas botaron en falta apoio emocional no momento do diagnóstico.
• O 50,59% sinalaron dificultades para comprender a enfermidade e a súa evolución.
• Máis do 30% agardaron máis de 6 meses para revisións ou consultas.
• Preto do 75% percibiu falta de coordinación entre os servizos sanitarios.
• Arredor do 39% indicaron non recibir servizos de rehabilitación a través do SERGAS.

Detrás de cada dato hai persoas convivindo coa incertidume, as esperas, as dificultades de acceso ou a necesidade de buscar información e recursos pola súa conta.

Unha atención sanitaria máis humana, coordinada e accesible

A Esclerose Múltiple é unha enfermidade complexa, cambiante e con necesidades moi diversas. Por iso, unha atención sanitaria de calidade depende da coordinación entre os servizos, da rapideza no acceso aos recursos, da información dispoñible e do acompañamento emocional.

Dende FEGADEM e as nosas entidades reclamamos:

• Máis recursos humanos e materiais.
• Menos listas de espera.
• Mellor coordinación entre especialidades e administracións.
• Máis apoio emocional dende o diagnóstico.
• Acceso equitativo aos servizos para as persoas do rural.
• Máis rehabilitación pública e continuada.
• Melloras no transporte adaptado e na accesibilidade.

Unha campaña para dar voz ás persoas con EM

Durante estes días, FEGADEM e as entidades galegas de Esclerose Múltiple estamos compartindo nas redes sociais diferentes testemuños de persoas con EM e profesionais, co obxectivo de visibilizar as realidades que existen detrás das estatísticas.

A campaña pódese seguirse en Facebook, Instagram e TikTok a través das contas oficiais.

Porque detrás de cada diagnóstico hai unha persoa. E detrás de cada demanda, unha dificultade que merece ser enfrontada.

Sigamos loitando por manter e mellorar a calidade da asistencia sanitaria pública en Galicia para as persoas con Esclerose Múltiple.