O 21 de xuño foi o Día Mundial da ELA e dende FEGADEM explicamos as diferenzas entre a ELA e a EM
Habitualmente, a ELA e a Esclerose Múltiple confúndense por ser ambas enfermidades neurodexenerativas e ter algúns síntomas en común, pero son moi distintas e é importante diferencialas.
O 21 de xuño foi o Día Mundial da ELA (Esclerose Lateral Amiotrófica). Nesta data, as asociacións relacionadas e a sociedade en xeral visibiliza esta enfermidade para esixir máis investigación, máis coidados e máis humanidade. Dende AGAELA lembran que a ELA non espera e as promesas non curan, polo que é importante actuar canto antes e lograr o financiamento necesario para mellorar a calidade de vida das persoas que conviven con esta enfermidade.
É un erro común confundir a Esclerose Múltiple (EM) coa ELA. Aínda que ambas son enfermidades neurolóxicas, hai moitas diferenzas entre as dúas que é importante coñecer e distinguir.
Que é a ELA?
A Esclerose Lateral Amiotrófica (ELA) é unha enfermidade progresiva que afecta ás neuronas motoras, que son as reponsables de controlar os movementos voluntarios. A medida que estas neuronas se van deteriorando a causa da enfermidade, os músculos vanse debilitando e atrofiando, o que provoca síntomas como:
- Debilidade muscular progresiva.
- Dificultades para falar (disartria).
- Problemas para tragar (disfaxia).
- Perda de mobilidade.
- Dificultades respiratorias.
Principais características da ELA
- Progresión rápida e esperanza de vida reducida.
- Non ten cura actualmente.
- As persoas adoitan conservar as súas capacidades cognitivas.
- Adoita diagnosticarse entre os 40 e os 70 anos.
Que é a EM?
A Esclerose Múltiple (EM) é unha enfermidade autoinmune que afecta ao sistema nervioso central. Con esta enfermidade, o propio sistema inmunolóxico do corpo ataca por erro á mielina, que é a substancia que protexe as fibras nerviosas. Isto xenera dificultades á hora de que o cerebro envíe mensaxes ao resto do corpo, o que provoca síntomas que poden aparecer e desaparecer en forma de brotes, na maioría dos casos. Os síntomas son moi variados e dependen de cada persoa.
Principais características da EM
- Pronóstico, de momento, impredicible (aínda que vanse facendo melloras grazas á investigación).
- Presenta remisións e caídas (polo menos na EM remitente-recorrente).
- Pode afectar á mobilidade, á visión, ao equilibro, provocar fatiga, afectar á saúde mental… Nalgúns casos, os síntomas pódense mitigar ou solucionar en gran medida grazas aos tratamentos rehabilitadores.
- Adoita diagnosticarse entre os 20 e os 40 anos.
- Adoita traer consigo dificultades cognitivas.
- De momento non ten cura.
Principais diferenzas entre a ELA e a EM
| Característica | ELA | EM |
| Tipo de enfermidade | Neurodexenerativa | Neurodexenerativa autoinmune |
| Afectación | Neuronas motoras | Mielina |
| Progresión | Rápida e continua | Variable, con brotes e remisións (salvo nos tipos progresivos) |
| Esperanza de vida | Reducida (promedio de 3 a 5 anos) | Similar á dunha persoa sen EM ou lixeiramente máis reducida (entre 70 e 80 anos) |
| Dificultades cognitivas | Raro ou pouco común | Moi habitual |
| Idade de diagnóstico | Entre 40 e 70 anos | Entre 20 e 40 anos |
| Primeiros síntomas máis comúns | Debilidade muscular, problemas para falar ou problemas para tragar | Parestesias ou problemas de visión |
A quen se diagnostica?
A EM é moito máis común que a ELA, afectando a primeira a unhas 2,9 millóns de persoas no mundo e a segunda a unhas 560.000 persoas. Tamén son diferentes os perfís aos que se lles adoita diagnosticar. Vexamos as diferenzas:
| Característica | ELA | EM |
| Idade de diagnóstico | Entre 40 e 70 anos | Entre 20 e 40 anos |
| Persoas con maior prevalencia | Homes | Mulleres |
| Zonas máis afectadas | A todas as persoas por igual | Máis persoas caucásicas |
| Factor xenético | Pode ser herdada | Non é hereditaria, aínda que ten un factor xenético |
Tratamentos
Ambas enfermidades non teñen cura aínda, pero hai tratamentos farmacolóxicos e rehabilitadores que poden axudar a xestionar os síntomas e reducir a progresión da discapacidade. A rehabilitación é moi útil, nos dous casos, para mellorar a calidade de vida.
Reivindicacións
Dende AGAELA reivindican máis coidados, axudas, humanidade e financiación. Porque a ELA non espera e as promesas non curan.
AGAELA é a Asociación Galega de Esclerose Lateral Amiotrófica e ten unha serie de servizos e axudas para as persoas e familias con ELA. Ademais, algunhas das nosas asociacións membro traballan con ambas enfermidades (EM e ELA), polo que podes contactar para saber máis.
