Apoio ás entidades
En FEGADEM sabemos que o asociacionismo é moi importante para afrontar a vida con Esclerose Múltiple (EM). Un dos nosos servizos é o de apoio ás entidades membro, acompañándoas e reforzando o seu traballo para que poidan seguir mellorando a calidade de vida das persoas con EM e das súas familias.
Que é o servizo de apoio ás entidades membro?
O principal obxectivo deste servizo é ofrecer soporte técnico, operativo e estratéxico ás entidades membro de FEGADEM, permitindo que poidan centrarse na súa principal misión: mellorar a calidade de vida das persoas con EM e as súas familias, promovendo a súa inclusión social. Así, traballamos en colaboración con estas asociacións para conseguir os nosos obxectivos.
O apoio ás entidades membro fortalece o tecido asociativo da EM en Galicia. A través da colaboración e do traballo en rede, compartimos boas prácticas, impulsamos proxectos comúns e reforzamos a presenza institucional do movemento asociativo.
Xestión da financiación
Apoiamos ás entidades na obtención de subvencións, axudas e financiamento público e/ou privado, para garantir a sostibilidade dos seus servizos. Ofrecemos orientación na redacción de proxectos, seguimento de convocatorias e xustificacións técnicas e económicas.
Apoio técnico e formación
Proporcionamos asistencia técnica continuada, resolución de dúbidas operativas e xestión de recursos. Ademais, organizamos espazos de aprendizaxe adaptados ás necesidades das entidades, fomentando unha xestión eficaz e profesionalizada.
Atención personalizada ás necesidades
Cada entidade é única, polo que realizamos un seguimento individualizado, detectando necesidades específicas e ofrecendo solucións a medida: mellora de procesos internos, desenvolvemento organizativo, comunicación, estratexia...
Servizo de derivación
Coordinamos a derivación das persoas con EM e as súas familias á asociación que mellor lles conveña, asegurando que reciban atención axeitada e especializada de forma rápida e eficaz. Este proceso facilita a conexión entre as persoas e os recusos dispoñibles en Galicia.
As nosas entidades membro
As asociacións que forman parte de FEGADEM son o fundamento do noso traballo. Elas ofrecen os servizos de rehabilitación ás persoas con EM e ás súas familias, como fisioterapia, logopedia, psicoloxía…
