Nutrición
A alimentación e uns hábitos de vida saudables son básicos para ter unha mellor calidade de vida, e máis cando se convive cunha enfermidade como a Esclerose Múltiple. Co noso servizo de nutrición buscamos orientar, asesorar e divulgar sobre a importancia dunha boa alimentación.
Que é o servizo de nutrición?
O principal obxectivo deste servizo é ofrecer asesoramento individual e/ou grupal a persoas socias das nosas entidades membro que precisen información arredor do campo da nutrición. Dende a Federación contamos con recursos e materiais divulgativos que serven como guía para levar uns bos hábitos alimentarios.
A nutrición na Esclerose Múltiple é moi relevante, xa que moitos elementos relacionados con esta, como a microbiota ou a inflamación, relaciónanse directamente coa enfermidade. Ter unhas pautas, unha boa orientación e coñecer os beneficios de certos hábitos pode axudar a xestionar mellor os síntomas e reducir a inflamación.
Sesións grupais e individuais
As persoas socias das entidades membro que o precisen poderán concertar sesións individuais co servizo de nutrición de FEGADEM, que tamén realizará sesións grupais.
Asesoramento e información
As persoas con Esclerose Múltiple que teñan algunha dúbida sobre nutrición poderán contactar coa Federación para obter unha orientación que resolva as súas cuestións.
Materiais divulgativos e sensibilización
A través deste servizo realizamos materiais divulgativos que se orienten a transmitir a importancia da nutrición e que dean indicacións clave para uns hábitos saudables. Guías, documentos, publicacións...
Charlas e formacións
Impártense xornadas e formacións, tanto ao público en xeral como ao persoal técnico das asociacións, para promover a importancia da nutrición na xestión da Esclerose Múltiple e divulgar información relevante sobre esta mesma.