Unha análise de sangue podería detectar a Esclerose Múltiple antes de que se produzan danos neurolóxicos
En España estímase que hai unhas 58.510 persoas diagnosticadas de Esclerose Múltiple (EM), das cales o 68% son mulleres. A idade media de diagnóstico é de 32 anos. En Galicia, hai máis de 4.500 persoas diagnosticadas e é unha das comunidades autónomas con maior prevalencia.
A Esclerose Múltiple é unha enfermidade crónica, neurodexenerativa e autoinmune que afecta ao sistema nervioso central. Nela, o sistema inmunolóxico ataca por erro á mielina, que é a capa protectora das células nerviosas. Isto provoca que a información non viaxe polas fibras nerviosas facilmente. Recibe o nome da “enfermidade das mil caras” pola gran variedade de síntomas que pode presentar.
O diagnóstico ata agora
O diagnóstico da EM é un proceso clínico completo que consta de varias probas centradas en descartar outras enfermidades, pero non hai ningunha proba específica para detectala. Revísase a historia clínica, fanse exploracións neurolóxicas, resonancias magnéticas… Todo isto vén recollido nos Criterios McDonald, recén actualizados este 2025.
É importante contar co diagnóstico canto antes para comezar os tratamentos de maneira precoz e retrasar así a progresión da enfermidade. Axilizar este proceso é clave. Cabe destacar que o diagnóstico, na actualidade, é un proceso caro e cun alto grao de erro, xa que depende da interpretación do/a neurólogo/a.
Novidades na análise de sangue
Nos últimos anos, varios estudos analizaron como a EM comeza a facerse visible no sangue antes do inicio dos síntomas. Un recente estudo publicado en Nature Medicine detectou que en 1 de cada 10 casos con EM, o corpo comeza a producir un tipo determinado de anticorpos. Estes loitan contra as súas propias proteínas antes de que aparezan os primeiros síntomas.
Seguindo estes descubrimentos, José Ramón Montero, fundador de Ala Diagnostics, informou de que están a desenvolver unha proba sanguínea para detectar a EM antes de que se produzan os danos neurolóxicos. Como afirmou Montero,
“Cunha gotiña de soro, que se extrae do sangue, podemos dicir cunha probablidade moi alta se estás afectado por esclerose múltiple ou non”.
Esta proba é compatible con outras e beneficia aos/ás profesionais e ás persoas con EM. Axiliza os procesos e mellora a eficacia diagnóstica. Ademais, é tamén unha proba que resulta moi barata, polo que sería sinxelo universalizala en caso de determinar a eficacia.
O futuro
Agárdase que en 2026 esta proba estea dispoñible en Europa e Estados Unidos. Polo baixo custe da mesma, será facilmente universal. Será un ensaio rápido e mecánico e espérase que estea presente en hospitais xa dende os próximos meses, aínda que as barreiras regulatorias son moi estritas e poden ralentizar o proceso.
Se nós conseguimos diagnosticar dunha forma eficaz a esclerose múltiple cunha proba en sangue, podemos facer que ese diagnóstico sexa extensible a case calqueira país do mundo (…) Ademais do impacto social, cremos que cobre unha necesidade médica non resolta e que vai ter unha boa acollida nos hospitais”, incidiu José Ramón Montero.
