A disfaxia na Esclerose Múltiple é un dos síntomas invisibles

No Día Mundial da Disfaxia, 12 de decembro, dende FEGADEM queremos visibilizar este síntoma invisible co que conviven moitas persoas con Esclerose Múltiple.

A disfaxia, ou dificultade para tragar, é un síntoma complexo e pouco coñecido que afecta a moitas persoas con Esclerose Múltiple (EM). A pesares de ser unha realidade frecuente, segue sendo un dos síntomas invisibilizados da enfermidade, como ocorre con outros asociados á EM.

Que é a disfaxia?

A disfaxia é a dificultade para trasladar alimentos líquidos ou mesmo saliva dende a boca ata o estómago. En persoas con EM, adoita estar asociada ás fases avanzadas da enfermidade, pero tamén pode presentarse en etapas iniciais. De feito, estímase que máis do 43% das persoas con EM experimentan disfaxia nalgún momento, aínda que este dato pode variar dependendo do método de avaliación utilizado.

En función da área afectada, a disfaxia pode ser:

Orofarínxea: dificultade para mover o bolo alimenticio da boca ao esófago. Este tipo é o máis habitual na EM.
Esofáxica: dificultade para trasladar o alimento dende o esófago ata o estómago.

Este síntoma, ademais de causar incomodidade, pode derivar en complicacións graves como pneumonías, desnutrición, deshidratación ou atragantamentos. É tamén unha causa importante de deterioro na calidade de vida, tanto a nivel físico como social, xa que pode limitar as interaccións e aumentar o illamento.

Síntomas invisibles, consecuencias reais

Moitas veces, a disfaxia pasa desapercibida, especialmente ao inicio, cando as sinais poden ser pouco visibles. Algunhas destas son:

Tos ou carraspeo ao comer ou inmediatamente despois.
Sensación de que a comida queda atrapada na gorxa.
Necesidade de tragar repetidamente ou en pequenas cantidades.
Dificultade para manexar a comida na boca.
Perda de peso ou episodios recorrentes de infecións respiratorias.

Estes síntomas, invisibles para quen arrodea á persoa, poden comprometer a saúde se non se detectan e tratan a tempo.

A abordaxe da disfaxia na EM

Unha das claves para tratar a disfaxia é a detección precoz. Avaliar a capacidade de deglución permite identificar o tipo e grao do problema, así como deseñar intervencións específicas para cada persoa. As estratexias de tratamento inclúen:

Intervención logopédica: o/a logopeda traballa na rehabilitación da musculatura implicada na deglución, utiliza técnicas posturais e pode empregar ferramentas como a estimulación eléctrica neuromuscular (NMES) para mellorar a funcionalidade.
Adaptación da dieta: aconséllase axustar a textura dos alimentos e líquidos para evitar atragantamentos e asegurar un estado nutricional óptimo. A orientación dun/ha nutricionista é clave neste proceso.
Educación e sensibilización: ensinar técnicas e pautas para previr complicacións, incluíndo cambios nos hábitos alimentarios e no entorno.

Nas nosas entidades contamos con profesionais especializados/as para axudar ás persoas con EM a xestionar este síntoma. Traballamos con enfoques personalizados para mellorar a seguridade na alimentación, mellorar a calidade de vida e previr riscos maiores.

A importancia de visibilizar a disfaxia

A disfaxia é un exemplo máis dos moitos síntomas invisibles que caracterizan á Esclerose Múltiple. Recoñecelos e poñelos sobre a mesa é esencial para garantir que as persoas reciban o apoio e os recursos necesarios.

Hoxe, 12 de decembro, é o Día Mundial da Disfaxia, e animámoste a reflexionar sobre a importancia de dar visibilidade ao invisible. A saúde, o benestar e a dignidade das persoas con EM dependen de que todos e todas esteamos máis informados/as e comprometidos/as.

Consulta con profesionais e infórmate sobre como podemos axudarche nas nosas entidades. Porque ningún síntoma, por invisible que pareza, debería quedar sen atención.