As persoas con Esclerose Múltiple reclaman en Galicia máis apoio no Día Mundial da enfermidade, que afecta a 4.500 galegos
Investigación, rehabilitación, recoñecemento do 33% de discapacidade, equidade e emprego para as persoas con EM, as principais reclamacións.
A Federación Galega de Esclerose Múltiple (FEGADEM) e as súas cinco asociacións membros celebran este luns 30 de maio o Día Mundial da Esclerose Múltiple para concienciar e poñer de manifesto a situación das persoas afectadas por esta enfermidade. No marco da campaña mundial ‘Conexiones EM’, as persoas afectadas pola enfermidade demandaron hoxe nas principais cidades galegas (Santiago, A Coruña, Vigo, Ourense y Lugo) medidas extraordinarias de financiación por parte do Estado e as Comunidades Autónomas para a total recuperación da normalidade na atención sanitaria e sociosanitaria en Esclerose Múltiple.
A Esclerose Múltiple é unha enfermidade crónica e neurodexenerativa que afecta ao Sistema Nervioso Central coñecida como a ‘enfermidade das mil caras’, dado que afecta a cada persoa de forma diferente. A día de hoxe non se coñece a súa causa, polo que non existe unha cura para a enfermidade. Trátase da segunda causa de discapacidade en adultos novos –tralos accidentes de tráfico- e afecta predominantemente ao sexo feminino.
Galicia é a comunidade autónoma coa prevalenza máis alta de Esclerose Múltiple de España, con preto de 4.500 pacientes e unha incidencia anual superior a oito pacientes por cada 100.000 habitantes, o que supón que se diagnostican dezanove novos casos cada mes.
QUE RECLAMAN AS PERSOAS CON ESCLEROSE MÚLTIPLE?
Con motivo del Día Mundial da Esclerose Múltiple, as asociacións de pacientes de Esclerose Múltiple solicitan apoio e axudas co obxectivo de conseguir:
• Medidas extraordinarias de financiamento por parte do Estado e as Comunidades Autónomas para a total recuperación da normalidade na atención sanitaria e sociosanitaria en Esclerose Múltiple.
• Maior apoio gubernamental á investigación da Esclerose Múltiple.
• Acceso a un tratamento rehabilitador integral, personalizado, gratuíto e continuado, reforzando o papel que as organizacións de pacientes desenvolven neste campo.
• O recoñecemento automático do 33% do grado de discapacidade co diagnóstico, e a posta en marcha definitiva do novo baremo de discapacidade, que ‘mida’ situacións e síntomas invisibles que produce a Esclerose Múltiple.
• O acceso a unha información completa sobre datos relacionados coa Esclerose Múltiple en adultos e menores de 18 anos e sobre o impacto da situación xerada pola COVID-19.
• Equidade no acceso ao tratamento farmacolóxico que precise cada persoa en todos os centros hospitalarios.
• Maior compromiso dos empresarios nas adaptacións dos postos de traballo e o cumprimento do 2% que esixe a lexislación na contratación de persoas con discapacidade.
